Флеш-моби “Қадаме то Театр” дар мактаби санъати бачагона

Театре бо дили поку бе кина

 

Кӯдакиву наврасӣ даврае ҳаст, ки инсон ташаккул меёбад ва барои сохтан ё сухтани ояндааш саҳм мегузорад. Барои онки як шахс созандаи ҷаҳон оянда бошад ӯро дар ин давра роҳнамое лозим аст.  Бешак  дар ин давра моро мебояд барои сохтани як ИНСОН китоб хонд, театр рафт, филми тасвирию бачагона дид ва ашхоси покдилу хушрафтор ҳамнишин буд.

Театри бачагона, арусак ва хосса театрҳои тамошобини наврас саҳме бештаре метавонанд гузошта. Зеро аксари ҳунармандони чунин театрҳо аз миёни ҳамнаслонашон руи саҳна меоянд ва бо забону рафтор ва дарди худи онҳо аз саҳна ҳарф мезананд. Яке аз чунин гурӯҳи эъҷоди соли 1998 дар маркази вилояти Суғд таъсис ёфт. Ҳоло театри Тамошобини навраси шаҳри Хуҷанд ба номи Одилҷон Назаров мебошад.

Дар театр солҳои сол коргардони шинохтаи театр шодравон Ислом Саломов чун таҳиягар кор кардаасту шогирдони зиёде дар студияи назди ҳамин театр тарбия кард. Аз коргардонҳои шинохтаи кишвар бошад барои онҳо ҷойи ифтихор аст, ки Барзу Абдураззоқов дар солҳои аввали кориашон онҷо намоише руи саҳна бурдааст.

Хубтарин дастоварди онҳо дар Ҷашнвора-Озмуни Театрҳои касбӣ “Парасту-2019” мебошад, ки бо намоиши “Дили модар” сазовори мақоми 3-юм гаштанд. Коргардонии намоишро саркоргардони ҷавон Эҳсон Ҳомидов ба уҳда дошт.

13-уми сентябр соати 11:00 мавсими 22-юм бо намоиши “Харгушаки ҷасур”-Лора Веба шуруъ мешавад. Барои ихлосмандони театр мерасонем, ки намоиши ҷадид аст ва коргардонии норо Эҳсон Ҳомидов ба уҳда дорад ва дар зимн дар суҳбати телефони ба мо Эҳсон гуфтанд, умедворам барои тамошобинон хуш меояд.

Иттилои бештаре, ки аз театр дорем дар ин мавсим ҳунарманди театр Мирзоюсуф Ахмедов хоҳиши намоиши ҷадидро руи саҳна бурдан дорад. Бумеди сафар ва сазовор шудани ҷоизаҳои бештари театри дар хориҷу дохили кишвар.

Театре ҳамеша дар шӯру ғавғо.

            Воқеан театр бояд маконе бошад ҳамеша шӯру ғавғо онҷо шунида шавад агарне онҷоро ибодатгоҳ мебояд гуфт.

Анҷоми даҳаи солҳои 70-уми асри пор як гурӯҳ хатмкунандагони шуъбаи актёрии Донишгоҳи Олли Театрии ш. Маскав бо устодии Бибиков ва Пижова ба Тоҷикистон омаданд. Ҳукуматро зарурат пеш омад то театреро барои ин гурӯҳ таъсис диҳанд. Бинои кинотеатрро ҳунармандони ҷавони пурэнержии тоза аз шаҳри бузург омада дасту остин барзада ба театр табдил доданд. Корҳои дипломиашон барои худ дар пойтахти Тоҷикистони Шӯравӣ зуд бинанда ҷамъ кард. Чанд нафари онҳо рафтанд дуболи корҳои идорӣ аммо қисми зиёди ин ҷавонон ҳоло майдондорони ҳунари кишвар ба ҳисоб мераванд. Имсолу солҳои пор ҷашни 60, 65-70 солагии умрашонро дар бинои Театри Давлатии Ҷавонон ба номи М. Воҳидов ҷашн гирифтанд. Ҳанузҳам онҳоро чун гули сари сабат ва асосгузори ин театр қадр мекунанду саҳна барояшон озод аст.

Театри давлатии Ҷавонон баъди қабули онҳо боз чандин маротиба гурӯҳӣ ва як то ду се нафари ҳунарманд қабул кардаасту мекунад. Ин театр таҷрибаҳои корӣ бо коргардонҳои маъруфи дохилу хориҷро дорад.  Ҳабибулло Абдураззоқов, Турахон Аҳмадхонов, Баҳодур Миралибеков, Мирзоватан Миров, Барзу Абдураззоқов, Шавкат Халилов, Султон Усмонов, Нозим Меликов ва чандин нафари дигар аз саромадони корҳои коргардонии театр буданд. Фаррухи Қосим низ баъди омадан бо аҳли шогирдонаш аз театри собиқ Қурғот  еппа  инҷо намоише кор карду рафтанд дунболи таъсиси театри Аҳорун.

Ҳайати ҳунармандони театр борҳо ба кишварҳои Осиёи Марказӣ, Афғонистон, ҶИ Эрон ва Руссияву то Аврупо низ сафари ҳунарӣ кардаанд. Ҳар ҷашнворае, ки намоишҳои Театри Ҷавонони ш. Душанбе равад дар 90% ҳолатҳо бо ҷоиза бармегарданд. Ҳатто аз аксари ҷашнвораҳо бо ду се ва панҷ ҷоиза омадаанд. Барои далел, боре бояд меҳмони театр шавем то таблои ҷоизаву дипломҳои театро бубинем. Аз ШОҲҶОИЗА-ҳо шуруъ карда то беҳтарин коргардону, нақши занонаву мардона, ороиши мусиқиву нақши лаҳзавӣ ва гурӯҳи беҳтарини ҳунармандон.

Охирин шоҳкории онҳо дар мавсими қаблӣ намоиши “Вақте куҳҳо суқут мекунанд”-и Чингиз Айгматов мебошад, ки Нозим Меликов таҳия кардааст. Дар Ҷашнвораи Театрҳои касбӣ “Парасту-2019” миёни 18 театр мақоми дуввум гирифта ба ҳунарпешаи ҷавони театр Шогун Давлатбекова нақши беҳтарини занона расид.

Суҳроб Ҷанҷолов ҳунарманд ва муовини театри Ҷавонон дар суҳбати телефони ба мо гуфт, ният дорем санаи 21-уми сентябр мавсими 48-уми театрро кушоем. Он рӯз намоиши “Эҳ ҷавонӣ-ҷавонӣ”-и М Бахтӣ руи саҳна меравад, ки мавсими қаблӣ онро коргардон Шавкат Халилов таҳия карда буд.

Ёдовар мешавем аҳли театр ният доранд дар мавсими 48-ум аз кишвари ҳамсоя  Узбекистон коргардон Олимҷон Салимов-ро даъват кунанд ва намоиши “Тарма”-ро руи саҳна баранд. Ин намоиш ба қалами драматурги турк, Турҷен Ҷуҷеноғлу таълуқ дошта  чанд соли охир диққати аҳли театриҳои Осиёро ҷалб кардааст.

Бинои театр дар хиёбони Неъмат Қарабоев поинтар аз бинои “Сирк” ва “Олами китоб” ҷой гирифтааст.  Барои дустдорони театр дар саҳфаи фейсбукии театр навгониҳо нашр мешаванд. Биёед ба Театри давлатии Ҷавонон то лаҳзае дар миёни шӯру ғавғои намоишҳои онҳо монед(м).

 

Театре дар соҳили Сайҳун

Ё “Табиби паррон”-и ҷавон парвозаш ба руи олам.

Дар оғози солҳои 30-юми қарни пор дар маркази вилояти собиқ Ленинобод ва акнун Суғд шаҳри Хуҷанд зарурати таъсиси театр ба вуҷуд омад. Аввалин ҳайати театр аз ҳисоби омузгорони мактаби мусиқии шаҳр пур карда шуд. Нахустин намоишҳои ҳирфави руи ин саҳна бо номи “Ғалаба” ва “Ду комунист”-и Комил Яшин буданд, ки аз мавзуҳои ҷанги шаҳрвандии аввали аср мегуфт. Театр машҳур шуд он замон бо номи Театри мусиқӣ мазҳакавии ба номи Пушкини ш. Хуҷанд, ки ҳоло ба номи Камоли Хуҷандӣ гузашт. Шакли дурусти навишти номи театр ҳоло чунин ёд мешавад. Театри Давлатии Мазҳака Мусиқавии  ба номи Камоли Хуҷандӣ. Дар репертуари театри мазкур аз асарҳои драматургони ҷаҳонӣ сар карда то Осиёву дохили кишвар таҳия шудааст.  Сакби намоишҳо ба ҷуз мусиқиву комедӣ, мелодрамму драмма ва ҳатто барои кӯдакон низ ҳаст. Сафарҳои аҳли ҳунари театр давоми ин ҳама солҳо ба кишварҳои Фаронса, Лаҳистон, Ҷопону Чин, Ҳиндустону Покистон ва Афғонистон буд.  Дар театр то инвақт коргардонҳое чун Ислом Саломов, Барзу Абдуразоқов, Сайрам Исоева, Қурбон Бобоҷонов, Суҳроб Шехов ва дигарон кор кардаанду карда истодаанд.

Соли 1961 бо роҳхати ҳукумати марказӣ онвақтаи Тоҷикистони Шӯравӣ  як гуруҳи калони хатмкунандагони Донишгоҳи Оллии театри ш. Маскав ба ин театр фиристода шуданд. Баъди як то ду соли кори қисми зиёд онҳо дубора ба маркази кишвар онвақт Сталинобод баргаштанд.

Баҳори имсол баъди ширкат дар ҷашнвораи театрҳои кабии “Парасту”-2019 онҳо бо намоиши “Табиби паррон”-и коргардон Суҳроб Шехов ба ҷашнвораи байналмилалии “Навруз” ба шаҳри Қазони Тотористон рафтанд. Дар суҳбати телефони ба мо саркоргардони театр Суҳроб Шехов гуфтанд, ки ният дорем бо дастгирии Мақомоти Иҷроияи Ҳокимати Давлатии Вилояти Суғд давоми моҳҳои  октябр ва ноябр ба ду ҷашнвораи дигар ба кишварҳои Қазоқистону Туркменистон равем. Дар зимн ҷои зикр аст, ки баъди сафари аҳли театр ба ш. Қазон аз тарафи раиси Вилояти Суғд Раҷаббой Аҳмадзода барои ҳунармандон як мошини тамғааш “Мерседес-Спринтер” туҳфа карда шуд. “Табиби паррон”-парвозаш баъд аз 27-уми сентябр ба як қатор шаҳрҳои Узбекистон идома меёбад. Онҳо ният доранд ин намоишро барои бинандагони шаҳрҳои Тошкент, Самарқанду Бухоро иҷро кунанд.

Суҳроб Шехов дар идомаи суҳбат ба мо гуфтанд мавсими 86-уми театр бо намоиши нав бо номи “СМС”  оғоз меёбад. Муаллифи асар Денис Смирнов буда онро Ҷумъа Қудус тарҷума кардааст. Аз руи барномаҳои кории мо тақрибан нимаи моҳи октябр мавсим бо намоши нави “СМС”  шуруъ мешавад.

Суроғаи театр  барои кулли дустдоронаш ошност. Рӯ ба руи осорхонаи марказии шаҳр ва боғи Камоли Хуҷандӣ.

ТЕАТР дар қалби Душанбе

Арусак ё лухтакбозӣ, ки дар ҳар гӯшаи Тоҷикистон онро ҳаргуна ном мебаранд таърихи беш аз ҳазор солаҳо дорад миёни кӯдакону наврасони мо. Аз инҷост, ки насли наврас бештар аз ҳама ин навъи театрро интихоб мекунад. Дар таърихи гузаштаи мо аз доштани чунин  театрҳо борҳо ёд шудааст. Аммо аксарияти ин гурӯҳҳо бо доштани чанд арусак ва латтапорае аз деҳа ба деҳа гашта миёни саҳрову куҳу пушта  як гушаро ба худ ихтиёр карда намоиш иҷро мерафтанд. Баробари омадани Шӯравӣ ин навъи ҳунар низ чун санъати театрӣ дар кишвари мо пазируфта шуд ва руи саҳнаи касбӣ рафт.

7-уми сентябри соли 1987 дар ш. Душанбе ягона театри Лухтак ба кор шурӯъ кард. То имрӯз ҳунармандони театр наздик ба 100 намоишнома руи саҳна бурдаанд. Аҳли эъҷодии театри  дар ҳамкори бо коргардонҳои хориҷ низ таҷрибаҳои калон доранд. Яке аз иқдомҳои неки ҳунармандони театри Лухтак ташкил ва гузаронидани Ҷашнвораи театрҳои арусак “Чодари хаёл” мебошад, ки сол дар миён дар кишвари мо баргузор мешавад. Мо давоми 7 давраи ин ҷашнвора шоҳиди ташрифи меҳмонҳо бо намоишҳои арусаки аз кишварҳои Осиёи Марказӣ ва дуртар аз он будем. Дар ин баробар худи онҳо низ ҳамасола то ду се сафари хориҷ аз кишвар мекунанд, ки бо ҷоиза низ бар мегарданд. Бояд қайд кард, ки иқдоми қабли дигари театр доштани студия дар назди театр мебошад, ки баъди ба воя расидани онҳо аксарияташон чун ҳунарманд дар ҳамин театр  ба кор медароянд ё барои таҳсил дар ин соҳа ба Донишкадаҳои дохилу хориҷ ба рои таҳсил мераванд.

Мавсими 35-уми театри Лухтак санаи 5-уми сентябр соати 10 дар бинои театр баргузор мегардад.  Намоиши аввалини ин масвим “Маша ва Хирс” аз руи афсонаҳои русӣ мебошад, ки коргардони собиқадори театр Зафар Ҷаводзода таҳия кардааст. Ин намоиш дар охири мавсими қаблӣ  руи саҳна рафта буд ва барои тамошобинон ҳоло нав ба ҳисоб меравад, гуфт дар суҳбати телефони ба мо муовини Театри Лухтак, Наргис Розиқова.

Ёдовар мешавем, ки аҳли театр баъд аз ҷашни Истиқлол тасмими нахустнамоиши “Се хоҳаракон”-ро доранд ва он аз руи афсонаҳои халқии тоҷик таҳи шудааст. Бинои театр  дар ш. Душанбе, кучаи Шоҳтемур 54/1 ҷойгир аст. Паҳлуи боғи “Кудакон”. Ворид шудан ба намоишҳои театр аз 5 сомонӣ шурӯъ шуда то 10 сомонӣ мерасад.

 

ТЕАТР дар бинои муқаддас

Театри русӣ драмавии ба номи Вл. Маяковский дар ш. Душанбе аз солҳои аввали таъсисёбии ҳукумати Тоҷикистони Шӯравӣ фаъолият мекунад. Барои ташкил ва пешбурди кори театр як гуруҳи ҳунармандон дар солҳои 30-юми қарни пор аз Маскав қалби СССР омада буданд. Бинои аслии театр дар маркази шаҳр қарор дошт. Дар ин бино аввалин театри касбии Тоҷик 7-уми ноябри соли 1929 парда кушода буд. Аввалин намои синамо низ 16-уми октябри ҳамон сол дар ин бино экран шуд. Тоҷикистон ҳамчун кишвари 7-уми Шуравӣ аз ҳайати Узбекистон берун шуданаш низ дар ин бино эълон шуда буд. Хонаи радиои низ онҷо буд. Макони муқаддас барои мардуми Тоҷикистон дониста мешуд.

Ҳунармандони театри мазкур се соли охир иҷоранишини ошёнаи 3-юми Театри ба номи А. Лоҳутӣ мебошанд ва онҳо дар руи саҳна бурдани намоишу гирифтани ҷоизаҳо аз дигар театриҳои кишвар кам нестанд. Мухлисони театр низ ҳунармандони театрро фаромуш накардаанду ҳатман барои тамошои онҳо мераванд. Баъди тахриби бинои асосии театр дар марказӣ шаҳр ҳоло Ҳукумати кишвар тасмим дорад дар бинои собиқ кинотеатри Тоҷикистон дар барои аҳли ин театр бинои нав сохта ба истифода диҳанд. Тарҳ ва сохтумони ин бино дар ҳоли анҷомёбист.

Имсол ҳунармандони театри  ба номи Вл. Маяковсий дар ҷашнвораи театрҳои касбӣ “Парасту”- 2019 бо намоишномаи “Тартюф”-и Ж.Б. Молер дар коргардонии Баҳодур Миралибеков иштирок карданд. Ҳунарманд ва коргардони театр Хуршед Мустафоев дар ҷашнвора ба гирифтани “беҳтарин нақши мардона” созовор дониста шуд. Дар зимн мегуем, ки театри мазкур миёни театрҳои Тоҷикистон солҳои 90-ум ва 10-солаи аввали 2000-ум яке аз серҷоиза ва серсафартаринҳо ба ҳисоб меравад.

Онҳо мавсими 82-уми худро бо намоиши “Подлеки Майсары” дар коргардонии Хуршед Мустафоев санаи 07-уми сентябр соати 16 пешвоз мегиранд. Дустдорони ин театр метавонанд он рӯз ба ошёнаи сеюми театри драмавии ба номи А. Лоҳутӣ ташриф биёранд. Саҳфаи Фейсбукии театр барои иттилои бештар гирифтан ин рақамҳоро дар ихтиёри мо гузоштааст. 907617891
918617891

Хабари охирине, ки мо аз театр мешунавем аҳли эъҷод дар мавсими нав паи таҳияи намоишноми “Ҳамлет”-и Шекспир бо коргардонии Ҳунарманди мардумии Тоҷикистон Баҳодур Миралибеков мебошанд.

 

Театри шаҳри Худоҳо

 

Якуми январи соли 1990 дар заминаи театр-студияи таҷрибавии Фаррухи Қосим, дар назди ҳукумати шаҳри Душанбе театри таҷрибавии тамошобини ҷавон “Аҳорун” таъсис шуд.

Рӯзи 30-юми январи ҳамон сол “Юсуфи гумгашта боз ояд ба Канъон…”, нахустин намоишномаи ин театр Гран-Прии нахустин Ҷашнвораи театрҳои тамошобини ҷавони Осиёи Марказиро ба худ касб карда ва дар моҳи ноябри ҳамон сол дорандаи Гран-Прии “Наврӯз 90” дар Ҷашнвораи театрии минтақаӣ шуд.

Намоишномаҳои Фаррухи Қосим ва театри “Аҳорун” тавассути шева, мусиқӣ, ритм ва фалсафаи тоза, ҷараёне нав дар роҳи таъсиси театри миллии Тоҷикистонро мушаххас кард.

“Юсуфи гумгашта боз ояд ба Канъон…”, “Даҷҷол”, “Исфандиёр”, “Шайх Санъон”, “Шоҳ Фаридун” ва “Шоҳ Лир” аз ҷумлаи намоишномаҳои ин театр дар таҳияи Фаррухи Қосим, барандаи ҷоизаҳои зиёде дар ҷашнвораҳои минтақаӣ ва байналмилалӣ шуданд.

Театр-студияи “Аҳорун”, ки аз соли 2007 бо номи Муҳаммадҷон Қосимов – падари Фаррухи Қосим – Муҳаммадҷон Қосимов ёд мешавад.

Театр мавсими 29-ми худро санаи 29-ми сентябр бо намоиши Ватандорӣ оғоз намуд. Намоиши “Ватандорӣ”дар асоси ашъори Лоиқ ва дар таҳияву иҷрои Фирдавси Қосим рӯи саҳна омада дар ҷашнвораи Парасту-2019 соҳиби ду ҷоиза: Беҳтарин нақши мардона ва беҳтарин ороиши мусиқӣ гардид.

Чунон, ки Фирдавси Қосим телефонӣ иттилоъ дод ин мавсим онҳо ният доранд, ки аз рӯи асари шоҳномаи устод Фирдавсӣ дар омехтаги бо Макбети Шекспир як намоишномаи ҷадидро дар таҳияи худи Фирдавс рӯи саҳна хоҳанд овард.

Ин театр ба тамошобин бовар ба худ ва ба шикастнопазирии Зебоӣ, Меҳр ва Ҳунарро тақдим мекунад.

 

Театр дар шаҳри Офтобӣ

Шаҳри офтобӣ, миёни заминҳои паҳновару шоҳроҳи Бохтар-Кулоб ҷойгир шуда Данғара.

Даврони Истиқлол маркази ноҳия дубора обод шуда ба як шаҳраки замонавӣ табдил шудааст. Роҳҳои мумфарш, чароғҳои фурузон ва мактабу донишгоҳу боғҳои фароғатӣ. Ҳукумати Ҷумҳури баъди ба даст овардани Истиқлолият зарурати ташкили як театри касбии дигарро дар Вилояти Хатлон дарк карда онро сар аз соли 2003 дар шаҳраки Данғара таъсис доданд. То имрӯз аҳли эъҷод намоишҳои  «Сӯҳони қазо»-и А. Абдуҷабборов, «Афсона мехоҳам»-и Ҷ.Қуддус, «Соли нав дар Яхобод»-и Ҳ.Салимов ва И.Сафаров. «Бойи золим ва хурўси ҷабрдида»-и Ш. Солеҳов. «Фолбинии Афандӣ»-и А. Баҳриро руйи саҳна оварда ҷоизаву унвонҳо низ овардаанд ба театр.

Мавсими 15-уми Театри ҷумҳуриявии мусиқӣ -драмавии н. Данғара санаҳои 18-ум то 20-уми сентябр шуруъ мешавад. Мо тасмим дорем ин мавсимро ба намоиши “Баҳори Фаронса”-и Тоҳири Маҳмадризо шурӯъ кунем, гуфт ба мо вақти суҳбати телефонӣ директори театр Раҳмонзода Илҳом.

Ёдовар мешавем, ки бо намоиши мазкур ҳунармандони театр иштирокчии Фестивали театрҳои касбӣ “Парасту” 2019 мебошанд. Сазовари ҷоизаи “Беҳтарин драммаи саҳнавӣ” шуданд. Ин намоишномаро коргардон Абдушукур Ҷураев таҳия кардааст.

 

 

Театр дар канори руди Вахш

Маркази Вилоят, шаҳри пур аҳолӣ, дар канори руди Вахш. То соле пеш ном дошт Қурғонтеппа ва акнун бо далоили таърихи ном гирифта  Бохтар ва маркази вилояти Хатлони Тоҷикистон дониста мешавад. Дар 100 километраи дури аз пойтхат ҷой гирифтааст бо аҳолии беш аз 100 ҳазора. Ҳоли ҳозир дар шаҳр ду театри касбӣ фаъолият мекунад. Театри арусаки  соли пеш таъсис ёфт. Театри давлатии мусиқӣ-мазҳакавии ба номи Ато Муҳаммадҷонов, ки оғози фаъолияташон аз соли 1979 маншаъ мегирад.

Дар саҳнаи театр намоишҳои «Лаку Пак»-и А. Қодирӣ ва И. Усмонов, «Тавҳид»-и С. Умар, «Бўрёкўбони Харгўш»-и Х. Давлатов, «Кулвори сеҳрнок»-и А. Файзиев, «Аскарҳо»-и М. Варфаламеев ва даҳҳои намоишномаҳои сатҳи ҷаҳонӣ таҳия шудааст. Онҳо қариб ҳамасола як то ду сафари ҳунари ба хориҷ аз кишвар мекунанду аз ҷашнвораҳои хориҷ ҷоизаҳои “Беҳтарин нақши мардона дар намои аввалу дуюм” мегиранд. Дар ин театр ҳунармандони дорои унвонҳои мардумӣ, шоиста ва аълочиёни фарҳанг кор мекунанд. Имсол онҳо дар Ҷашнвораи театрҳои касбӣ “Парасту”-2019 бо намоиши “Карим девона” миёни 18 театр сазовори ҷойи 3-юм шуданд.

То соле пеш роҳбарии театрро Ҳунарманди мардумии кишвар Аловуддин Абдуллоев ба уҳда дошт. Акнун наздик ба як сол мешавад ин зимаро ҳунарманди ҷавон Отахон Саидзода ба уҳда гирифтааст. Отахон Саидзода ба мо гуфт:- Мавсими ҷашни дорем, яъне 40-умин мавсимро ба намоиши “Салом падарони азиз” дар коргардонии Муҳаммад Шомуддинов шурӯъ мекунем. Ин мавсим бояд баъди 20-уми сентябр парда ба руи тамошобинон боз кунем.

Зикр кардан ба маврид аст, ки бинои Театри давлатии мусиқӣ-мазҳакавии ба номи Ато Муҳаммадҷонов ду сол қабл сохта ба истифода дода шудаст.